香港 5G 服务已经推出咗一段时间，各电讯商係时候要谂多啲应用方案吸客。其中 SmarTone 上星期就推出咗一个新 5G Plan，用意係想畀大家喺屋企当宽频。以月费 $148 就有无限 5G 数据来讲，尚算吸引。如果要将 5G 讯号当屋企宽频用的话，一个 5G Router 就是必须的。用得呢个 Plan，SmarTone 自然有 5G Router 配套畀到大家。今次就同大家测试一下，睇睇好唔好用。
SmarTone 今次推出嘅呢个新 Plan 对于有光纤入屋嘅朋友来讲可能未必吸引，因为光纤速度一定快同稳定过 Data 上网，不过对于一类住唐楼或者乡效村屋无光纤舖线嘅人来讲，有一定吸引力。
以往要用到 SIM 卡上网一般都係 4G，但而家已经开咗 5G 当然係要用返 5G 啦。而 SmarTone 藉着 Ericsson 嘅 DSS 技术已经将部份 4G 讯号升级成 5G 令到覆盖率大大提升。
要将 5G 讯号变成屋企宽频，一部支援 5G SIM 嘅 Router 就少不免。而家上 SmarTone 呢个新 Plan 就可以加 $2,160 购买，部机支援 Wi-Fi 6 制式，简单理解就係以 5G 讯号转成 Wi-Fi 6 讯号畀家中所有上网装置用。
部机用法好简单，机底打开插入 5G/4G 数据 SIM 卡，再插上电源就用得。留意机底有两个 QR Code，一个係 2.4G Wi-Fi 一个係 5G Wi-Fi，只要用 Android 手机 Scan 一下就会自动连接，免去手动输入密码嘅麻烦。当然，预设密码係随时可以进入 Router 后台度修改。
Router 插上电源线开机就用得，无须进行任何设定。而机身亦设有一个 WAN 头及两个 LAN 头，如果屋企本身有宽频线，唔插 SIM 卡当佢係普通 Wi-Fi 6 Router 用亦得。
▲ 开机后，稍等一阵，所有指示灯着起就可以使用。其中最顶三粒灯係讯号灯，着晒三粒代表讯息接收良好
Winson 自己本身住大埔比较入嘅位置，平时手机上网速度比起市区慢。以往用手机 SIM 卡网络测试一般只有 2x 至 3x Mbps 之间。而今次呢部 Router 据了解有内置 Extender 功能，可以将讯号放大，令到上网速度更加快。
▲ 测试时，手机插 SmarTone SIM 卡下载速度为 37.4Mbps
▲ 连接 5G Router 后，下载速度略升至 62.5Mbps。呢个速度，约等于 100Mbps 光纤宽频。一般上网卓卓有余，播放串流影片 1080P 或以下都好流畅。
现时大埔地区 SmarTone 嘅 5G 讯号仍未完整覆盖，但透过其 DSS 技术已经可以透过 4G 既有嘅 2100Hz 频谱来发射 5G 讯号。测试所见，由于 Winson 本身居住位置比较入，所以讯号亦比较弱。这亦是今次 SmarTone 推出呢个 Plan 嘅目的。以往住唐楼或者村屋因为无舖设光纤线，所以上网只能透过 ADSL 电话线超慢速，或者以 4G 数据卡上网。今次 SmarTone 推出 5G Plan 就正好解决呢个问题。速度上，当然会好受到接收範围所影响，而测试所见经过 5G Router 后的确有所改善。
Update:
▲ 我地测试咗另一个讯号接收较好嘅位置，下载速度达到 308Mbps，算是不错的成绩
不过就要留意，今次个 $148 Plan 张 5G SIM 只可以用于呢部 5G Router 或者其他限定型号 Router，但就唔可以用落手机度。对我本人来讲，由于居住地方无光纤线，所以速度其实尚可。呢个价钱，我会当係申请一条 100Mbps 嘅宽频线。对于住市区有 1Gbps 或以上嘅人来讲，实觉得贵，但对于一众住村屋嘅用户来讲，还可以啦!
PS. 部 Router 无限定喺边度用，换言之你喜欢的话将佢带返公司/朋友屋企用都得，去到 5G 讯号接收好嘅位置速度自然会更加快。3.5Ghz 嘅 5G 讯号範围就可以上 500Mbps 或以上，一个月费开心 Share!
