SmarTone 上个月终于正式公布推出 5G 计划，虽然迟咗些少，不过 SmarTone 反而有唔少「杀着」令到佢地获得更多人关注。今日 SmarTone 就喺观塘 APM 以及中环 IFC 举行 RoadShow 以展示 5G 应用体验，期间我地都八到大家关心嘅其中一个问题：咁地铁线几时有 5G 啊?
先了解一下 SmarTone 嘅 5G，相信大家都知佢地係全港唯一一间採用爱立信设备建设 5G 嘅一间网络商。而用 Ericsson 嘅好处，就係可以发挥佢地独有嘅 DSS (Dynamic Specturm Sharing) 技术。而 DSS 强项在于灵活弹性地给 4G 及 5G 共用频谱，可以喺 4G/5G 之间嘅信号切换做到 1 微秒。运用现时已有嘅 4G 网络轻鬆提升至 5G，从而加快全港 5G 嘅覆盖率。
Ericsson 5G DSS 技术图解
今日 SmarTone 喺观塘 APM 以及中环 IFC 举行 RoadShow，期间我地都访问过 SmarTone 工程部总管梁忠兴先生，问及地铁几时支援 5G 呢个好多人都想知嘅问题。梁先生表示，SmarTone 现时 5G 舖设利用 Ericsson 嘅 DSS 技术优势，透过现时 4G 嘅 LTE 2100 (N1) 频谱提供 5G 覆盖，因此可以好快地喺全港各区开启 5G 服务。
SmarTone 工程部总管梁忠兴先生
咁地铁呢?相信大家都知现时地铁各线 SmarTone 嘅覆盖及速度都做得唔错，而梁先生表示已经加紧同地铁公司合作，最快有望今个月内透过 LTE 2100 (N1) 频谱，先喺最主要嘅三条线，即荃湾线、观塘线、柴湾线，提供 5G 覆盖服务。
5G，大家可能听得最多嘅係用中频 3.3/3.5GHz、4.9GHz 或高频 26/28GHz，好处就係速度快以及超级快，但坏处就係越高频射程越短。而用 LTE 2100 嘅频谱去升级做 5G，速度来讲对比起 3.5GHz 当然有所不及，但好处就係覆盖率高好多，而且亦都有 5G 嘅低时延特性，例如平均做到 10 – 12 ms，呢个好处已经比起 4G 嘅 2x 至 4x ms 好得多。再加上，5G 可以让同时更多装置连接。据梁先生讲，地铁 5G 开通初期虽然 4G 及 5G 共用 2100 频谱，但资源唔会偏向其中一边。因为随住 5G 手机越来越多，表示用 4G 嘅就自然地会相对减少，所以唔会出现「争频」嘅情况。
所以，透过现时地铁各线嘅 SmarTone 4G 速度，可以大概了解到今年 5G 初期喺地铁推出时嘅速度，我地就叫佢做「準5G」啦。当然，随住日后 5G 网络再升级，来年嘅 SA 5G 网络，速度必定会比起现时高好多。
以下「準5G」大家可以「先作个参考」，强调返：以下係用 SmarTone 嘅 5G SIM 卡行 4G 网络作测试，速度跟 5G 必有落差，地铁 5G 要等开通先有 (最快今个月内)，届时再为大家测试：
▲ 中环 (大堂)，下载 263Mbps
▲ 尖沙咀 (月台)，下载 277Mbps
除咗大堂及月台，我地早前都有测试过 SmarTone 喺地铁车厢行驶紧速度，大家按呢度睇返作为参考。换言之，现时 SmarTone 喺地铁主要三条线嘅 4G 速度已经十分理想，由此可见同样係採用 2100MHz 频谱去做 5G 嘅话，相信速度都可以保持到 4G 以上嘅质素，到日后再升级后预计会更加快。
